Herrizaingo Saila: ALDERDI POLITIKOEN EGOITZEN ETA JARDUERA POLITIKOEN SEGURTASUN NEURRIAK INDARTZEKO DIRU-LAGUNTZAK
Gobernu Batzordeak gaur, Legebiltzarrean ordezkatutako alderdi politikoei edota hauteskunde-koalizioei zenbait diru-laguntza ematea onetsi du gertakari terroristek sortutako mehatxuak direla-eta, segurtasun-premiei aurre egiteko asmoz.
Ekimen honek EAJ-PNV, EA, Ezker Batua eta Alderdi Sozialistaren arteko 2008ko aurrekontuaren erdibideko zuzenketa batean du jatorria, hain zuzen ere.
Helburua hurrengo hau da, ETA edo kale indarkeriaren aldetik etorritako legez aurkako mehatxuen iraunkortasuna dela-eta, hainbat alderdi poltikok euren ohiko erakunde eta politika jarduera garatzeko oztopoak ekiditea.
Alderdi edo hauteskunde-koalizio bakoitzak diru-laguntza bat izango du eta laguntza horren zenbatekoa Eusko Legebiltzarrean duten eserleku eta botoen araberakoa izango da.
Laguntza horren ordainketa segurtasun arloan gastu-frogagiriak aurkeztu ahala, gauzatuko da; betiere, diru-laguntza bakoitzean ezarritako gehienezko muga errespetatzen bada.
Alderdi politiko edota hauteskunde-koalizio bakoitzari emango zaion gehienezko zenbatekoa hurrengoa da:
EAJ-PNV/EA 226.383,09 €
EAJ-PNV/EA/EA-NV 109.894,16 €
PSE-EE (PSOE) 200.980,04 €
PP 158.692,43 €
Ezker Batua-Berdeak-IU 42.815,34 €
Aralar 11.234,94 €
Hezkuntza, Unibertsitate eta Ikerketa Saila: TOKI ERAKUNDEENAK DIREN ESKOLA-ERAIKIN PUBLIKOEN ERABILPENA
Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko bileran onartu du toki erakundeenak diren eskola-eraikin publikoak erabiltzeko erregimen juridikoari buruzko dekretu-proiektua.
Euskal Autonomia Erkidegoko eskola-eraikin publikoak Haur Hezkuntzako, Lehen Hezkuntzako edo Hezkuntza Bereziko irakaskuntza-zerbitzuak ez diren beste zerbitzu edo helburu batzuetarako erabiltzeko erregimen juridikoa arautzea du dekretu honek helburu.
Administrazio-baimen edo aitorpenaren bidez edo lankidetza-hitzarmena izenpetuz erabili ahal izango dira bakarrik eskola-eraikin publikoak beste zerbitzu edo helburu batzuetarako.
Hezkuntza, Unibertsitate eta Ikerketa Saila: UNIBERTSITATEAZ KANPOKO IKASTETXE PUBLIKOEN ERAIKIN ETA INSTALAZIOEN ERABILPENA
Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko bileran onartu du Euskal Autonomia Erkidegoko unibertsitateaz kanpoko ikastetxe publikoen eraikin eta instalazioak ikastetxe horien urteko programazioetan ez dauden jardueretarako erabiltzea arautzeko dekretu-proiektua.
Euskal Autonomia Erkidegoko unibertsitateaz kanpoko ikastetxe publikoei, ikastetxearen urteko programazioan ez dauden hezkuntza-, kirol-, kultura- edo beste gizarte-ekintza batzuk egiteko, administrazio eta erakunde publikoek eta beste edozein pertsona fisiko edo juridikok emango dieten erabilpena arautzea du Dekretu honek helburu.
Jarduerak gauzatzeko eskola-eraikin eta instalazioak erabiltzea ez da hezkuntzaren helburu orokorren kontra joango eta, betiere, elkarbizitzaren printzipio demokratikoak errespetatuko ditu. Helburu sozial argia duten jardueretarako erabili ahal izango dira bakarrik ikastetxeak eta jarduera pribatuak edo familia mailakoak erabilpen horretatik at geratuko dira, baita irabazteko asmoak dituen edozein jarduera ere.
Hezkuntza, Unibertsitate eta Ikerketa Saila: PRAKTIKA ONAK SARITZEA LANBIDE HEZIKETAKO GELA ETA TAILERRETAN
Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko bileran onartu du Lanbide Heziketako gela eta tailerretan egiten diren praktika onei eman beharreko sariak arautzen dituen dekretu-proiektua, ondo egiteari eta etengabeko hobekuntzari lotutako jarrera eta baloreak ikasleengan bultzatzeko eta irakaskuntza-praktika, multimedia sistemak erabiltzearen bidez, sustatzeko.
Urtero deituko dira Lanbide Heziketako gela eta tailerretan egiten diren praktika onei eman beharreko sariak eta Lanbide Heziketako heziketa-zikloetan klasea ematen duten EAEko irakasleek jaso ahal izango dituzte sari horiek.
Ondorengo kontzeptuengatik identifikatu eta aukeratuko dira praktika onak: ikaskuntza autonomoan eta lankidetza-ikaskuntzan oinarritutako portaera eta jarrerei lotutako gaitasunak eskuratzera bideratutako ikasleen ikaskuntza-jarduerak eta informazio- eta komunikazio-teknologia berriak erabili eta ikasteko metodo eta prozesuak gaurkotzeko prozesuetan aplikatzea.
Hezkuntza, Unibertsitate eta Ikerketa Saila: 9 MILIOI EURO PERTSONAL IKERTZAILEA PRESTATU ETA HOBETZEKO BEKETARAKO
Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko bileran onartu du 2008/2009 ikasturterako pertsonal ikertzailearen prestakuntza eta hobekuntza-programetarako dirulaguntza berriak eta aurrekoak berriro ematea arautu eta deitzen dituen agindua.
2008/2009 ikasturterako pertsonal ikertzailearen prestakuntza- eta hobekuntza-programetarako dirulaguntza berriak eta aurrekoak berriro ematea arautu eta deitzea ditu programa honek, 9.113.340 euroko zenbateko globalean, helburu eta, horretarako, jarduera-ildo hauek izango ditu:
Prestakuntza:
AE modalitatea: doktoretza aurreko dirulaguntzen programa, pertsonal ikertzailea Espainiako aplikazio-zentroetan prestatzeko.
AK modalitatea: doktoretza aurreko dirulaguntzen programa, pertsonal ikertzailea atzerriko aplikazio-zentroetan prestatzeko.
B modalitatea: doktoretza aurreko dirulaguntzen programa, proiektuei lotutako pertsonal ikertzailea prestatzeko.
Hobekuntza:
DK modalitatea: doktoretza ondoko dirulaguntzen programa, atzerrian jarduten duen pertsonal ikertzailearen hobekuntzarako.
Kultura Saila: ARKEOLOGIA ETA PALEONTOLOGIA MATERIALAK KATALOGATZEKO DIRULAGUNTZA
Kultura Sailak aurkezturik, Gobernu Batzordeak Euskadiko arkeologia aztarnategietan baimendutako indusketen ondorioz aurkitutako material arkeologiko edota paleontologikoen katalogazioa egiteko dirulaguntzak emateko agindu deialdia onartu du.
Arkeologia eta paleontologiako ikertzaileei zuzendutako laguntza deialdi honen bitartez, eskuhartze baimenduen ondorioz Euskadiko arkeologia aztarnategietan aurkitutako arkeologia eta paleontologia materialak katalogatzeko dirulaguntzak bideratuko dira. Guztira, 108.200 euro erabiliko dira horretarako eta indarrean egongo da agindua Euskal Herriko Aginte Aldizkarian argitaratu ondoren.
Kultura Saila: EUSKARRI BERRIETAKO IKUS-ENTZUNEZKOEN EKOIZPENA
Kultura sailburuaren proposamenaren harira, Gobernu Batzordeak euskarri berrietan ikus-entzunezko sorkuntza eta ekoizpena bultzatzeko dirulaguntza deialdia onartu du. Deialdi berri honen bitartez euskarri berrietan (mugikorretako plataformetan, Interneten…) garatutako ikus-entzunezkoen ekoizpena bultzatu nahi da eta horretarako 30.000 euro bideratuko dira.
|
-->
