Émile Zola, frantses idazlea, naturalismoaren sortzailea (Paris, 1840-1902). Parisen jaio arren, haur eta gazte denbora Aix-en-Provencen eman zuen. Zazpi urte zituela aita hil zitzaion, familia egoera txarrean utzita. 1858an Parisa itzuli eta hainbat lanetan aritu zen. Hachéete liburu-dendan hasi zen arte. Hortik aurrera, artikuluak idazten hasi zen prentsarako eta lehenengo literatura lanak argitaratzen. Haren obrarik handiena Les Rougon-Macquart saileko hogei eleberriak dira, 1868-93 urteen artean idatziak. Herentziari eta gizarte inguruneari buruzko esperimentu zientifikoen eraginez, giza bizitzaren alderdi guztietan sakontzea erabaki eta XIX. mende bukaerako Frantziaren erretratu harrigarria bezain zehatza margotu zuen. Arrakasta handia lortu zuen sail horretako eleberri batzuekin (L' assommoir, Nana, Germinal, esaterako), baina baita kritika latzak ere, zenbait egoeraren gordintasuna zela eta.