Garoa, Kresala bezala, ohiturazko nobela edo "novela costumbrista" delakoa dugu. Idazleak bizimodu zehatz bat erakutsi nahi digu, berori guztioi eredu izan dakigun.

Garoa euskal tradizioaren balore zaharren defentsan oinarritzen da, batez ere bizimodu eta pentsaera berria zabaltzen ari den garaian haiei eusteko beharrizana ikusita. Horregatik nobelan azaltzen den giroak eta inguru guztiak balore horiek azpimarratzeko helburua dute.

Kresalak itsasaldeko giro eta bizimodua jasotzen badu, Garoan nekazaritza mundua azalduko zaigu. Nekazaritza mundu hori Joanes eta beraren familiarengan ispilatuta aurkituko dugu, eredurik hoberen bihurtu direlarik.