Fedea, aberria, eta gizabanako-mailako maitasuna dira Auņemendiko Lorea-ko mataza ehotzen duten hiru osagai nagusiak. Riktrudis protagonista eta Portun eragile dituztela, kristau-fedea / "fede zarra", frankotarrak / euskaldunak aurkakotasunek, Portunek eta Adalbaldok Riktrudis maitatzeak eratzen duen maitasun-triangeluaz lagundurik sortutako korapiloek, Adalbaldoren heriotzarekin eta Portunen kristautzearekin aurkituko dute oreka berria.

Agirrek histori-liburuetan ikasitakoa hartu zuen abiapuntu eleberria burutzeko, baina garaiko giro historikoaren azterketa xehea alboratuz, gatazkak oso modu gardenean eta muturrekoan, ņanardura eta aringarririk gabe aurkeztuz, une horretako gizarte-harremanek erakus zezaketen konplexutasunean sakondu gabe, aldaketa historiko baten berri ematera jotzen du: kristautasunaren garaipena jentiltasunaren aurrean. Riktrudisek hezurmamitzen duen kristautasunaren edertasunak Portun liluratzean erdietsitako garaipena da, euskal buruzagiak "fede zarretik" kristau-federa egindako bidaian irudikatutako garaipena.